香港煲仔飯推薦 | 1. 風味園
香港煲仔飯 | 喺凍冰冰嘅冬天，最啱食返個暖笠笠嘅煲仔飯，所以小編精選7大高人氣嘅香港煲仔飯餐廳，除咗以傳統炭爐製作，仲會推出fusion新口味，部份煲仔飯更獲得米芝蓮推薦！即睇以下內文介紹啦！
圖片來源：Openrice @foodie_kpm、@VivianChung7207、@catcatsharon、@MakC9、@Bella Bearla、@FEEDYOURSOUL、@Emily CCC、@Mytlikeat、@hkfo.odlover、@ramenholic、@estherrrrrrrliu | 撰文：Icy
香港煲仔飯推薦 | 1. 風味園
同一大班朋友食煲仔飯，最就近當然去旺角啦！位於旺角通菜街嘅風味園，曾得到facebook群組「香港煲仔飯關注組」力推～煲仔飯款式非常多，多達四十多款，例如臘味、土魷肉餅、豉油白鱔、窩蛋免治牛肉、鳳爪排骨、田雞等等，充滿飯焦嘅香味。大家仲可以配上風味園自家製嘅風味醬，味道類似馬拉盞及XO醬，令煲仔飯更添風味！
魚肉好新鮮嫩滑（圖片來源：Openrice @foodie_kpm）
臘腸配肉餅非常鹹香（圖片來源：Openrice @foodie_kpm）
睇落賣相都唔錯～（圖片來源：Openrice @VivianChung7207）
【INFO】
風味園
地址：旺角通菜街113-115號地舖
營業時間：每日24小時
價錢：$76-$119不等
香港煲仔飯推薦 | 2. 紹華小廚
位於筲箕灣熟食中心嘅紹華小廚，主打創新嘅煲仔飯口味，味道新鮮之餘份量又大。款式包括野菌鵝肝、豉汁帆立貝象拔蚌、蒜香牛頸脊、豬膶黃鱔等等，用料夠晒靚，配上甜豉油，味道特別香口。而且米飯粒粒分明，唔會乾晒水，仲有脆卜卜嘅飯焦，充滿炭香！
臘肉香濃惹味（圖片來源：Openrice @catcatsharon）
脆卜卜嘅飯焦（圖片來源：Openrice @catcatsharon）
【INFO】
紹華小廚
地址：筲箕灣愛秩序灣道15號愛秩序灣街市暨綜合服務大樓CF3號舖
營業時間：星期一至六 07:00-22:00
價錢：$80-$90不等
香港煲仔飯推薦 | 3. 坤記煲仔小菜
位於西營盤嘅坤記煲仔小菜，以原汁原味嘅傳統煲仔飯聞名，由於餐廳環境唔算大，所以座位經常爆滿，想食都要排一兩個鐘！傳統臘味煲仔飯鋪滿充滿油香嘅臘腸，米飯粒粒分明，加上香口嘅飯焦，口感層次豐富～比較受歡迎嘅煲仔飯款式仲有臘味滑雞、臘味排骨、油鴨、白鱔等等，肉質鮮嫩，撈埋甜豉油一齊食，零捨入味！
肉質鮮嫩嘅白鱔（圖片來源：Openrice @MakC9）
好多人為咗食坤記嘅煲仔飯而排足兩小時！（圖片來源：Openrice @Bella Bearla）
【INFO】
坤記煲仔小菜
地址：西環西營盤皇后大道西263號和益大廈地下1號舖
營業時間：星期一至六17:30-22:30、星期日18:00-22:30
價錢：$95-$130不等
香港煲仔飯推薦 | 4. 嚐囍煲仔小菜
位於堅尼地城嘅嚐囍煲仔小菜，曾經獲得米芝蓮推薦，係屬於港島一帶比較馳名嘅煲仔飯餐廳，長期排長龍～餐廳主打招牌火山石煲仔飯，即係選用塗上耐熱瓷層嘅瓦煲，避免因火力過猛而煲燶飯，熱力分佈更平均，飯焦亦都更金黃香脆。煲仔飯款式十分多，例如白鱔冬菇滑鷄、臘味排骨、臘味滑雞、臘腸加潤腸等等，款款都咁惹味！
好多人推薦嘅臘味排骨飯（圖片來源：Openrice @FEEDYOURSOUL）
肉餅同甜豉油簡直係絕配！（圖片來源：Openrice @Emily CCC）
【INFO】
嚐囍煲仔小菜
地址：西環堅尼地城北街25號地舖
營業時間：每日05:00-22:00
價錢：$92-$128不等
香港煲仔飯推薦 | 5. 興記菜館
油麻地廟街一向都係食煲仔飯嘅勝地，而興記菜館就係廟街最出名嘅餐廳之一。熱騰騰嘅煲仔飯即叫即製，米飯粒粒分明，底部有金黃可口嘅飯焦。熱門款式包括章魚雞粒、白鱔、油鴨脾、臘味排骨等等，款款足料，多種配搭任君選擇。大家仲可以感受最地道嘅大排檔飲食文化，介紹俾外國朋友一定唔怕失禮！
食煲仔飯前，建議大家淋三圈甜豉油就啱啱好～（圖片來源：Openrice @Mytlikeat）
煲仔飯賣相吸引，令人食慾大開！（圖片來源：Openrice @hkfo.odlover）
【INFO】
興記菜館
地址：油麻地廟街12、14、15、17、19號地舖
營業時間：每日13:30-15:30以及17:30-23:00
價錢：$95-$180不等
香港煲仔飯推薦 | 6. 合利潮州打冷飯店
位於佐敦廟街嘅合利潮州打冷飯店，雖然主打潮州打冷，但佢哋嘅煲仔飯亦好受歡迎。款式未必有其他煲仔飯餐廳咁多，但價錢都頗划算。推薦款式有鹹魚肉餅、鳳爪排骨、滑牛肉、油鴨等等，肉質鮮美唔會太乾，鍾意重口味嘅朋友仲可以加鹹蛋或者指天椒～
最經典嘅臘肉煲仔飯（圖片來源：Openrice @ramenholic）
豉椒排骨非常鹹香～（圖片來源：Openrice @ramenholic）
【INFO】
合利潮州打冷飯店
地址：佐敦廟街259A號地下A&B號舖
營業時間：每日17:00-00:00
價錢：$80-118$不等
香港煲仔飯推薦 | 7. 江湖小棧
位於荃灣嘅江湖小棧，主打自家煉製豬油煲仔飯，聞落特別惹味～大家可以按自己喜好而落豬油或豉油，再冚蓋焗一焗就食得。飯粒吸咗豬油後特別香，飯焦亦好脆口。款式方面，大家可以選擇土魷肉餅、窩蛋牛肉、白鱔、蝦醬肉片、潤腸臘腸等等，配料既豐富又新鮮～
雖然要大排長龍，但好多食客都表示值得。（圖片來源：Openrice @estherrrrrrrliu）
惹味嘅醬料係煲仔飯嘅靈魂之一。（圖片來源：Openrice @estherrrrrrrliu）
【INFO】
江湖小棧
地址：荃灣鱟地坊30號寶成大廈1號地舖
營業時間：每日17:30-00:00
價錢：$88-$92不等
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
Tags :
煲仔飯米芝蓮餐廳香港好去處飲食週末好去處sauce焦點sauce飲食
Icy Tsoi
01/03/2025